Le mot de la présidente

En neien Elan!
Léif Klenggäertner alleguer,
de Kongress um Lamperbierg huet mir perséinlech neie Courage gemaach an ass och bei den
Delegéierte gutt ukomm, sou wéi mer Echoe kruten.
Obwuel mer leider déi zwou Demissioune krute vum Generalsekretär a vum Tresorier, hu mer mat
onsen neien an ale Membere schonn an der éischter Sëtzung sou richteg ugerappt. Mir hunn
d’Chargen op méi Schëllere verdeelt, de Charel Siwek, dee spéitstens säit onsem Kongress
jidderengem e Begrëff ass, huet de Generalsekretär iwwerholl, mat der Hëllef vum Romaine
Weyer, an den Dan Frieden bäisst nach e bëssi op d’Zänn, bis mer en neien Tresorier fonnt hunn.
De ganze Kommitee mécht mat an d’Stëmmung war gutt.
Datt mer nëmmen nach 4 Zeitungen eraus kënne ginn, dat mir perséinlech och Leed, a vill vun
iech hunn sech an dem Sënn geäussert, ma ech mengen, et wier eng provisoresch Saach. Parallel
dozou ass onse Büro amgaang, eng Newsletter auszeschaffen, datt dir ëmmer aktuell
Informatioune kënnt kréien. Dofir brauche mer awer är Mailadressen! Mat den
Dateschutzbestëmmungen musst dir ons dofir äert Averständnis ginn. Mir wäerten deemnächst
op onser Internetsäit sou eng Fiche publizéieren, déi dir ons kënnt zréckschécken, fir
d’Newsletter, wéi dat op nei-lëtzeburgesch heescht, ze bezéien. Si ass iwwregens och mat engem
Mausklick rëm ofzebestellen.
An des Zeitung musse mer awer elo eng ganz Rei wichteg Liga-Themen eraquëtschen: E Bäitrag
zu Mammendag däerf natierlech net feelen, ass schliisslech eng Créatioun vun der Liga. Dann
fannt der och an de nächste Säiten den Opruff fir bei der „oppener Gaardepäertchen“
matzemaachen, a mir hoffen, datt sech rèem vill vun iech mëllen, fir och des Traditioun vun de
Klenggäertner oprecht ze halen. Dir musst iech awer leider op onser Internetsäit informéieren, a
wellech Gäert dir dëtt Joer kënnt virwëtze goe fir iech ze inspiréieren. Dat selwecht gëllt fir de neie
Medailereglement, dee misst och Ufank Mee op onsem Site stoen.
Nationalfeierdag fält och an dëst Blietchen, a mir loossen ons et natierlech net huelem, onsem
Staatschef an héije Patron a senger Familljen ons Sympathien a Gléckwënsch auszedrécken.
Mir hoffen, dir sidd prett sidd fir déi nei Gaardesaison… Mir hunn e flotte Beitrag geschriwwen
iwwer Dünge mat Schofswollpellets, hei hu jonk Leit sech Gedanke gemaach, fir en natierleche
Produit ze entwéckelen aus enger lieweger Matière, vun dem mer all kënne profitéieren.
Anscheinend en ale Brauch! Ech testen dat elo mol a mengem Gaart.
Eng schéi Fréijoers- a Summersaison gewënscht, an zwee gréng Daumen! Mir héieren am
September rëm vunenaner. Bleift ons trei!
Mat mengen allerbeschte Gréiss
Dr. Martine Mergen
Presidentin vum Gaart an Heem